افرحوا معاشر المغاربة…

لقد قررت حكومتنا الموقرة جدا تخفيض الضريبة على الدخل…مثلا إذا كنت في سلم 11 -بحالي- و على الله ما يطيحش بك، فإن الضريبة قد نزلت من 44 إلى 42 في المائة….و لأن الموظف في سلم 11 لي تيشد مبلغ يوازي 6500 درهم (ماشي 7000 مع خوتنا ديال "س ن إس إس") منين تيجمع السالير السنوي ديالو تيفوت 12000 درهم، فإنه يتساوى في نفس المجموعة مثله مثل الوزير لي تيشد 7 بريكات نت بلا ما نحسبوا البريمات و ديكشي لي تحت الطبلة الشيء الذي يسمح له بامتلاك بواخر في اعالي البحار بعد أن كانوا لا يملكون سوى بيجو 309 أيام رفع الأيادي و الأصوات تحت قبة البرلمان

ما علينا….المهم على همي و سعدي، كأي موظف يسيل لعابه لسماع هذا الخبر،  بغيت نشوف شحال هاد النت لي غادي يتزاد…شنو أنقوليكم…لقيت بالضبط أتزادلي 232 درهم…واييييييييه 232 درهم ما عرفتش فين غادي نكازيها…واش ديال ليسانس، واش ديال التقادية…

أليس هذا ضحكا على الذقون ؟؟ بل أليس هذا استهزاء بكل المغاربة ؟؟ ما هذا الإنجاز أيتها الحكومة المناضلة ؟؟ أليس حريا فتح التحقيقات في أموال الدولة التي تضيع ذات اليمين و دات الشمال بدل من هذه المهزلة التي طلعت بها حكومتنا الموقرة ؟؟ لا أخفيكم…أنني بدأت أيأس من وضع المغرب أن يصطلح يوما و رغم أنني من معارضي فكرة الحريك، لكن واك واك ألحق ؟؟؟ بلادنا تضيع و إلى مزيد من الهاوية….و ما تطلع به جرائدنا من أخبار الفساد التي تزكم الأنوف و ما خفي أعظم و أدهم….اللهم إن هذا منكر

أنا شخصيا ما عرفتش شنو خاص هاد البلاد باش تقّاد ؟ إذا قلنا العصا يقول ليك إرهابي…إذا قلنا مظاهرات سلمية يسلطوا عليك السيمي…و لي هضر يرعف

و لا حول و لا قوة إلا بالله العلي العظيم