يصعب في الحقيقة الكتابة في رمضان، ليس لأننا ممرضنين، و لكن لقلة الوقت، فتصبح المدونة ضحية، علي أبارك للجميع الشهر المبارك وأضع بين يديكم إيميلا جميلا توصلت به بين يدي رمضان بعنوان : هل أنت سكع ؟

دابا داز تقريبا النص ديال رمضان و يقدر الواحد يدير البيلان  bilan .

 بالنسبة للصلاة : واش حافظتي على الصلاة المفروضة في وقتها و في الجماعة؟ كيف راك عارف راه الصلاة المفروضة في رمضان تتحسب بسبعين ضعف. و إذن  إلى كونتي زهقتي و لو شي صلوات في جماعة راك سكع لأن الصلاة، و لو أنه من المفروض أن تكون العام كامل جماعة و في المسجد، إلا أنه في هذا الشهر بالذات الأجر مضاعف بزاف ) 5 صلوات × 70 ثواب رمضان × 27 بسبب الصلاة في المسجد × 30 = 3 ملايين حسنة بسبب الصلاة في المسجد(

هاذ الشي بالنسبة للصلاة المفروضة، أما النوافل فأجرها في رمضان بأجر الصلاة المفروضة. يعني غير اللي ما بغاش يجمع ملايين الحسنات بأعمال عادية جدا.

 بالنسبة للقرآن : ساليتي ختمة أولى أو لا باقي؟ والله لو أنك ما عازمش تختم القرآن ولو مرة وحدة فأنت ماشي غير سكع و إنما إمام السكعين.

رمضان هو الشهر اللي نزل فيه القرآن، و عند ختمه عندك دعوة لا ترد أبدا و القرآن هو لاسانسور في الجنة بحيث شحال ما قريتي في الدنيا شحال ما طلعتي درجات في الآخرة. ثم إلى ما قريتيش القرآن في رمضان إمتى غادي تقراه؟

 بالنسبة للقيام : ما تقولياش بأنك تسوكعتي و زهقتي شي تراويح أو أنك ما كملتيش مع الإمام شي ليلة. إلى ما قدرتيش تصليهم مور صلاة العشاء بسبب شي حاجة خارجة عن الإرادة راه كاينين التراويح ديال الفجر. المهم ما يطلع عليك النهار حتى تكون صليتي 11 ركعة. و عنداك أخاي تكون فرطتي فيهم أو ما كملتيهمش بسبب شي حاجة في التلفزة او شي ماتش ديال الكورة.

أو زايدون واش ما تتمرقش من راسك و أنت عارف أن الناس يركعون و يسجدون لربهم راجين منه عز و جل أن يغفر لهم خطاياهم و تفريطهم في عبادته أما أنت فمشغول بشي حاجة دنيوية؟

 و باقي ما يتقال على حوايج أخرى لازم الواحد ما يفرطش فيها بحال ذكر الله باستمرار، الصوم ماشي غير من الماكلة و إنما حتى من الذنوب و صلة الرحم و الصدقة و التوبة من الزبايل السابقة… المهم هو انك في رمضان تكون مبدل و تبين بأفعالك و اجتهادك و مقاومة النفس ديالك أنك عارف قيمة هاذ الشهر و les promotions اللي فيه، و تقول لإبليس أنك ماشي سكع بحالو و أنك ماغاديش تعصى الله بحالو و أنك عارف قيمة الوقت خصوصا في رمضان و ماغاديش تدوزو و أنت تشاهد شياطين الإنس في الأفلام و السيتكومات و الماتشات و أنك بلاصة ما تمشي للقهوة تتفضل تقرا القرآن أو تذكر الله و تستغفره أو حتى تجلس مع وليداتك…

 المهم راه باقي أكثر من النص ديال رمضان و السكع هو اللي البروغرام programme ديالو في الأيام العادية هو نفسه في رمضان. العمر راه تيهرب و الحساب تيقرب و ما غينفعنا هناك إلا ما زرعنا هنا.